仲有一個星期 

November 04 [Fri], 2011, 2:06
仲有一個星期, 我就返日本啦....
雖然之前都有試過成2年冇返日本, 今次都只係隔咗一年, 不過因為311嘅關係, 令我覺得返日本變得遙遠咗.
如果唔係老公係生日有event, 我都未必會返日本, 因為9月先為佢去北京, 短時間之內再去旅行都有少少過份.

只係去短短4日, 但有2日已經去event, 私人時間真係唔多, 而且仲有好多朋友要見, 真係有啲分身不下.
今日CX突然出平機票, 只係$1990, 雖然同我張DELTA差不多價錢, 只係平$10, 但因為有凌晨機, 11號朝早6點就到成田, 咁我嘅玩樂時間就多咗. 所以立刻打比AGENT同佢講取消DELTA個機位, 我自己上網book CX, 點知佢話佢book CX只係$1950, 仲平多少少, 所以都係由佢幫我訂位.

依家仲有係煩手信. 真係唔知買桃D, 太多嘢買過啦, 又要花時間再諗諗先....

陳家台灣之旅 DAY1. 

April 22 [Fri], 2011, 22:14
因為父王吹雞想一家人去旅行, 所以就叫我安排啦.
佢心目中嘅目的地係台灣, 因為早兩年同佢去過台灣後, 佢好鍾意當地嘅小食, 所以間中都話想再去, 所以今次目標鎖定去台北加宜蘭.

3月初開始計畫 (自己去旅行都冇咁神心), 到今日正式出發! 太好啦!!
我哋今次坐中華, 12點幾起飛, 係遲少少, 不過因為冇機坐, 加上前一日仲要返工 (再加上睇舞台劇), 呢個時間其實對我來講仲好.

一上機, 嘩! SURPRISE!! 原來agent幫我一行7人upgrade咗去business class! 真係估唔到!
所以父王太后, 叔叔嬸嬸都好開心咁展開我哋第一日行程.

除咗父王太后之外, 仲有家姐, 姐夫, 叔叔同嬸嬸一行7人去台灣玩!

SURPRISE! 我事先都唔知AGENT幫我upgarde去business class!
索柏嘅命運好似同我去台灣多, 我成日都唔記得拎佢返日本.

一落機, 就有人接我哋啦! 因為考慮到有老人家, 租車會方便同舒服啲, 所以今次就book咗8人volkswagen, 直接由機場出發去宜蘭!


因為係我編排行程, 所以我坐車頭做領隊, 呢班就係我嘅團友!

因為時間唔早, 所以第一個行程就係羅東夜市! 就係為咗小食! 真係一到步就食食食, 食到走為止, 仲要買外帶返旅館再食!

8點左右, 就坐車去礁溪, 因為我哋要浸溫泉!
我book咗間溫泉旅館, 價錢平得來, 個feel唔錯, 真係唔錯.



呢間就係我同姐姐&姐夫3人嘅房, 都大, 夠我哋瞓!


呢間就係父王同太后嘅房 (叔叔嬸嬸都係呢一個style), 有半露天溫泉, 正呀!

直子小姐 

April 21 [Thu], 2011, 23:22
今晚去大會堂睇同流嘅"直子小姐". 睇完覺得可以入我嘅BEST3之內.

"直子小姐"係由向田邦子小姐嘅"愛という字"改編而成.
好坦白, 我未睇呢套日劇, 不過睇完舞台劇之後, 我應該會係來緊訂書時, 會順便買番日本版來睇. (本人喜好, 好鍾意睇番原著來比較, 又或者想更深入了解個故事)
首先, 我覺得句slogan幾貼題, "我們都渴望愛, 再抑壓愛, 然後承受孤單", 雖然我唔多覺得承受孤單, 不過就好感受到渴望愛呢一點. 一開始以自白形式講直子小姐由渴望被愛, 到拍拖, 到結婚, 之後生小朋友到淡如止水, 都可以表達到"渴望愛, 再抑壓愛". 之後就入戲肉, 講直子小姐由偶然下遇上畫家, 發生曖昧, 令直子小姐再一次考慮"愛"係啲.

演員方面, 最擔心就一定係劉心悠, 唔係因為覺得佢做得唔好, 而係怕佢嘅廣東話發音. 雖然知道佢已經改進咗好多, 不過到現場又另一回事. 點知真係出事, 聽得好辛苦. 但唔係發音, 而係音量! 我已經坐係前列位置, 但覺得佢好細聲, 聽得好辛苦, 有時仲要估佢講, 所以減少咗投入感. 而佢嘅演技係冇問題, 而且佢嘅氣質都好啱直子小姐個角色. 如果有重演, 希望可以改善一吓聲量嘅問題.

劇本方面, 因為未睇原著, 所以唔知改得好唔好, 不過個劇就好令人細味. 我覺得日文名"愛という字"(愛這個字)比"直子小姐"更貼題, 不過如果為賣座, 用直子小姐就當然無話可說, 不過就減低咗個層次. 個劇講嘅愛比較淡, 唔係激情個種, 呢個好明顯係因為日本嘅民俗特性, 唔會將愛講出來, 好多時都係用好間接嘅行為去表達愛一個人, 就好似直子小姐好緊張老公, 見到老公比人偷咗隻錶係另一個男人手上帶住, 會好勇敢咁衝上前去攞返隻錶, 但又唔會直接比返老公, 要放係枱面上比佢發現, 呢個我覺得就係日本人對愛嘅正常表現. 但當直子小姐遇上畫家後, 因為畫家帶佢去一個佢以前未接觸過嘅世界, 而產生曖昧, 寫得都係好淡. 睇到呢度, 好明白直子點解會比畫家吸引, 因為係一個環境生活得耐, 當有新嘅衝擊出現, 當然會覺得吸引, 好想去再了解多啲, 但同畫家又係咪愛呢, 我又覺得未必係. 所以當最後直子小姐發現原來自己唔係唔愛老公,只係遺忘愛佢, 我就覺得好合理. 因為我都覺得好多時愛係一直存在, 只不過因為時間慢慢過去, 而又習慣咗被愛, 亦覺得理所當然時, 就會抑壓自己再投入更多嘅愛, 之後更忘記被愛, 而覺得自己已被愛遺棄. 另外, 亦因為愛一個人, 希望佢可以有更好嘅發展, 所以就主觀地將自己所想加在對方身上, 比咗無型壓力對方, 反而對方透唔到氣; 亦因為對方達唔到自己所希望, 令自己覺得對方唔著緊自己, 由愛變恨變疏離. 呢個就係我睇完個劇最大感受!

呢個舞台劇比我最大驚喜係沙畫, 好靚好match個劇情! 所以一開場時直子小姐嘅自白, 我對眼都只係掛住望住個screen嘅沙畫, 而唔係主角劉心悠. 而開場同closing都好首尾呼應, 好鍾意個concept. 另外有道光做條路出來帶出直子小姐個角色時都好正!
不過有一樣好想講, 只係差一樣嘢, 個劇就好prefect啦, 呢樣就係鞋抽! 因為日本人屋企都一定有鞋抽, 而且見演員出入屋企時都一定除鞋, 就知係跟日本習慣, 但點解個漏咗呢樣咁重要嘅嘢呢? Anson冇理由唔知架? 見到演員著鞋時要用手就覺得好唔慣啦. 唔知係咪我吹毛求疵, 但就真係睇唔順眼, 希望重演時可以加返.

完場後, 聽到向田和子小姐講呢個劇係第一次翻譯成外語係海外演出, 佢好感動. 當時個一刻我好有衝動想嗌"こちらこそ、ありがとう!". 當然我冇做到啦, 不過真係好多謝佢同意翻譯成香港版嘅劇本, 亦都有同流咁高嘅製作水準, 我先可以過咗一個好充實而又令我有所得著又回味嘅一晚!

父王70歲大壽 

February 26 [Sat], 2011, 23:17
早係半年前, 已經同父王講要同佢擺大壽, 請親戚朋友食飯, 不過父王唔肯, 一直堅持只係屋企人食飯就算, 來來回回同佢傾咗好多次, 只係話同親戚食飯都唔肯. 好彩, 父王最終都屈服, 最後肯擺4圍同親戚食飯.
其實點解我哋咁堅持擺大壽? 因為細細個時, 父王每年生日都會擺生日酒, 同親戚朋友夥計食飯, 當時都已經擺5/6圍左右. 不過之後舖頭冇做, 所以呢個習慣就冇咗, 對上一次就係父王嘅60大歲, 所以我哋好想再搞大去.

之前最主要係確定圍數, 我地保守估計, 只係請最熟嘅親戚最少都要4圍, 而各親戚大部份都好賞面出席. 因為我係最細嘅關係, 所以決定都唔係我做, 地點菜式全部都只係由太后同大家姐去話事, 我只係做中間人傳話.
當日我嘅工作都係PR, 即係吹水, 不過都兼職做攝記.

10年秋季日劇回顧. 

January 23 [Sun], 2011, 22:47
11年冬季日劇已經開鑼啦, 又係時間回顧我睇過嘅日劇啦.
今季睇咗7套: 流星, 打工仔想買屋, Guilty, Q10, 黃金之豚, 獸醫杜立コ, SPEC.

第7位: Q10
演員: 佐藤健, 前田敦子, 田中裕二, 藥師丸博子
故事大綱: 心臟有毛病的男主角對生命沒有太大留戀, 卻突如其來啟動了機械人, 而且要教識她生命的意義. 過程中令自己對生命有新的見解, 亦愛上機械人.

又唔係唔好睇, 有啲地方都睇到我喊, 不過個劇情唔通囉. 男主角可以咁簡單就鍾意咗機械人, 我反而覺得男主角嘅好朋友同同學嘅愛情更touching同合理. 不過今季好似冇其他校園青春劇, 咁就只好收貨啦.

第6位: 黃金之豚 ~ 會計檢查廳 特别搜查科
演員: 篠原涼子, 岡田將生, 大泉洋, 桐谷健太 山口紗彌加, 生瀬勝久, 宇津井健
故事大綱: 假釋中的女欺騙師意外加入會計檢查廳, 憑她獨特觸覺從而破解一宗宗不當使用稅款, 亦發現當中的陰謀.

劇情好似上季嘅Hammer Session, 欺騙師誤打誤撞之下係正途做好事. 我覺得上次Hammer Session個劇情順暢啲, 亦都比較容易理解; 但今次係公務員, 就算改resume, 都應該可以查到佢係假釋中, 唔做得公務員, 個交代太兒戲. 而更兒戲係每次都好似叮一聲就搵到破綻, 跟住就人還錢, 會唔會太簡單呢?

第5位: SPEC 〜警視庁公安部公安第五課未詳事件特別対策係事件簿〜
演員: 戶田惠梨香, 加瀬亮, 福田沙紀, 城田優, 神木隆之介, 椎名桔平. 竜雷太
故事大綱: SPEC指擁有普通人能力及常識所無法衡量的特殊能力, 而擁有SPEC的人將自己的能力用在殺人上, 令警方大為頭痛. 而未詳部門就是專門破解SPEC.

寫完個大綱都好似唔知講咗啲, 因為太亂啦!! 只可以講我唔夠聰明, 好多都睇唔明, 我係睇咗6/7集, 先開始大概知道佢想講桃. 而且個結局都未完, 雖然話冇電影版, 不過我就唔信囉. 如果鍾意mystery嘅人, 呢套應該好啱口味.

第4位: 打工仔想買屋 (フリーター、家を買う。)
演員: 二宮和也, 香里奈, 井川遙, 丸山隆平, 淺野溫子, 竹中直人
故事大綱: 只要工作上有少許不順意就辭職的男主角, 為咗因為被鄰居欺凌而患上嚴重抑鬱症的媽咪得到可以康復的機會, 決定儲錢搬屋. 過程中重新認識及改變對工作及家庭的看法.

親情方面寫得幾好, 睇到我都有喊; 工作方面就明囉, 因為都似時下年青人 (講到自己好老咁), 而且都預咗最終結果係咁; 反而係二宮同香里奈一齊就有少少怪, 雖然都係預咗佢哋係一對, 不過之前都唔係有好多鋪排, 所以最後真係一齊覺得奇怪囉. 我覺得二宮今次唔係做得咁好, 但竹中直人依然冇得頂!

第3位: 流星
演員: 竹野内豊, 上戶彩, 松田翔太, 北乃紀伊, 稻垣吾郎
故事大綱: 男主角的妹妹要換肝才能保住性命, 但家人無人合適要等候換肝; 女主角因為要為哥哥償還欠債所以做色情事業. 巧合下, 兩人相遇, 定下契約結婚, 男主角幫女主角還債, 而 女主角捐肝. 過程中發現彼此相愛但因為女主角的哥哥所阻止而被迫分開.

其實有啲拖戲, 個節奏好慢, 如果可以快番啲會好睇好多. 不過首主題曲幫咗唔少忙, 好啱mood, 亦令原本拖戲部份過得冇咁慢. 如果忍得到呢點其實係好touching. Goro都唔算係壞人, 不過係賤人囉. 但我又唔明點解上戶彩仲理佢, 真係攞戲來做. 竹野內豊都係留鬚好睇啲, 好掛住Boss入面嘅佢, 可唔可以還番Long Vacation入面嘅野獸真二比我呀?

第2位: 獸醫杜立コ (獣医ドリトル)
演員: 小栗旬, 井上真央, 成宮ェ貴, 笠原秀幸, 菅田將輝, 國村隼, 石坂浩二
故事大綱: 獸醫杜立コ人格很差, 而且經常將"獸醫是一門生意"掛在咀邊; 但他手術技巧一流而且對動物有愛心, 對於只是當寵物是玩伴的人很不屑.

好感動, 好令人反思嘅一部電視劇!! 真係唔知香港幾時會有呢一類帶有message嘅劇比人睇呢?? 雖然主角好似好貪錢咁, 手術費全部都好貴, 但帶出咗個問題係, 如果人的話, 幾貴都會醫; 但寵物的話, 就可以隨便買過另一隻, 點解要用咁多錢去救佢, 但其實寵物都係一條生命, 點解會同人唔同? 係因為短命啲? 定係可有可無, 有代替品? 每次做手術時, 我都會代入去, 如果係小K的話, 我會點呢?? 我到依家仲諗緊...

第1位: Guilty ~與惡魔有契約的女人 (ギルティ〜悪魔と契約した女)
演員: 菅野美穗, 玉木宏, 吉瀬美智子, 水上劍星, 吉田鋼太郎, 唐沢壽明
故事大綱: 女主角十五年前因為被冤枉而坐監, 出獄後為咗查明真相, 決定搵當年令她入獄的人報仇.

我覺得呢套可能係10年五部最好睇日劇之一. 你明知菅野美穗一定會得手, 雖然行為唔啱, 但依然會有少少同情佢. 佢每次殺完人之後個痛苦表情真係覺得佢好可憐. 雖然我知有唔少人覺得唔係咁好睇, 因為個結尾真係有少少令人驚訝, 但中間搵真兇部份我係覺得唔錯, 而且寫菅野美穗同玉木宏段愛情都好感人....

每個人睇劇嘅角度同出發點都唔同, 而且我又唔係專業, 只係因為睇咗咁多劇, 咪同大家分享吓, 所以我覺得好睇你未必認同, 不過咪當參考囉, 但唔好睇唔好鬧我呀!! 哈哈~~

笑の大学校園版 

January 21 [Fri], 2011, 21:15
今日請咗幾個鐘假去睇笑の大学!
(OS: 吓? 唔係噚晚先睇完, 今日中午又去睇??)
冇錯! 正確來講, 係睇咗3日, 星期三重溫日本電影版, 星期四睇舞台劇, 到星期五嘅今日, 係為咗睇Anson演出嘅校園版.

因為之前睇"獨坐婚姻介紹所"時, 感受到唔同演員做同一個角色係有咁大分別時, 所以都好想知道Anson嘅演出同陳生又幾唔同, 所以就去請假睇啦. 好似Anson咁講, 我相信除咗工作人員, 我應該係少數睇哂3個唔同版本嘅人.

睇完之後, 覺得Anson嘅演出比較接近Goro嘅手法, 輕鬆啲, 冇陳生個種堅持feel. 不過話哂係日本生活多年, Anson係禮儀表現嘅方面, 就真係好過陳生. 而且覺得審查官同作家嘅對抗同互動都冇陳生同ケ生個配合度咁高, 個timing捉得冇咁好, 所以有啲影響咗個劇嘅流暢度, 但冇法啦, 因為陳生同ケ生合作次數多咁多, 個默契一定好啲.

今日完咗之後, 有個坐談會比學生發表感想. 其中有留學日本嘅中國人問Anson翻譯成香港版有冇太大困難, 改動多唔多, 因為始終日本文化同香港唔同. 當時我好想答唔係太大改動. 其實我自己睇係冇中文字幕嘅日文電影版, 睇個時都會自己諗如果係廣東話會係點呢, 所以當我睇首演時咁感動就係因為同我所想嘅差唔多 (當然Anson文筆好過我好多....) 又或者咁講, 因為笑の大学嘅笑位唔係玩食字, 或者當地人先會明嘅生活細節上, 所以唔使大改動都可以表達到個劇嘅精髓.

睇咗4個版本 (連日本電影版), 作家椿一呢個角色, 我比較鍾意陳生嘅演繹, 雖然個角色由頭到尾嘅變化唔大, 但陳生係比較細緻, 掌握個心態上好似比較啱個角色多啲. 而審查官向坂睦男個角色, 我就鍾意役所広司嘅演譯, 因為好感受到佢嘅變化, 佢最後要忍住笑來鬧椿一時, 真係做得好好.

笑の大学第三度重演 

January 20 [Thu], 2011, 23:05
睇咗3次, 終於寫感想啦 (其實都已經現場同人講哂).

第一次係09年首演, 睇咗初日!! 好明顯, 當時係因為GORO而入場睇笑の大学. 雖然睇報導話同日本版唔會有好大改動, 但我覺得始終都會有分別.
睇完之後, 我係覺得好感動!! 雖然真係同日本版好似. 雖然我冇睇過日本嘅舞台版, 不過同電影版比較, 改動唔多, 當時電影版晝面情節更豐富.
第二次睇係10年重演, 都係睇初日. 因為兩位主角對掉角色來做, 所以又入場睇多次. 不過因為呢次兩位主角係兩個星期內要對掉角色, 所以有啲亂, 個節奏比較快, 所以覺得冇咁好睇.

到今次, 因為有同事未睇過, 而且又入場睇!
睇完之後, 都係覺得呢個組合係最好睇, 即係陳文剛做作家, ケ偉傑做審查官. 以演員來講, 審查官個角色係比較多變化, 正所謂"吃香"角色....(呵呵~), 陳文剛唔係handle唔到, 只係ケ偉傑個台型係比較match審查官, 一出來就覺得佢好壓得住個台; 而陳文剛handle作家個心態都比較好, 比較有passion同執著自己所堅持嘅feel出到來.
而且個劇本真係寫得好好, 睇咗咁多次仲笑得出. 當然演員出色, 但Anson嘅翻譯亦應記一功! 因為好原汁原味咁將日本版呈獻比香港人睇. 當然敬語部份刪減咗, 不過反而更令香港人容易明白 (所以我日文嘅敬語, 謙讓語到依家都唔係好得)

今次拉到個唔睇舞台劇嘅同事入場, 佢睇完之後都好開心, 之後仲會拉佢睇唔同劇種, 希望之後又會多一個人陪我睇啦.

新年あけましておめでとう! 

January 01 [Sat], 2011, 0:53
★゚・*:.。.:*・゜Happy New Year!! ゚・*:.。.:*・゚★
新年あけましておめでとう!
今年もステキな1年になりますように。


2011年が良いお年と思うね!!!

哈哈~~ 點解?? 因為我好愛嘅人陪我倒數囉!!
係日本時間倒數時, 有中居陪我倒數, 而之前就當然係睇紅白, SMAP做壓軸嘛.
而係香港時間倒數時, 我唔係睇住IFC嘅煙花, 而係係電腦mon前睇住5個男人又唱又跳來倒數!! 而且過咗12點時, 老公講咗句"Happy New Year!", 真係覺得同佢隔住兩個地方一齊倒數!!

咁多年來, 雖然佢哋有份做紅白, 不過一到倒數時, 都唔係一齊數, 但今年真係好唔同, 真係好開心!! 多謝TBS, 唔係TBS搵中居做CDTVスペシャル!年越しプレミアライブ2010→2011嘅司会, SMAP都唔會上去做嘉賓!!

一開始都唔知SMAP幾時會表演, 所以拎定我嘅過年食品出來同自己慶祝!

背後個mon個男人就係中居啦!! 我睇梗realtime直播來陪我countdown!

點知11:45分左右, SMAP就開始表演啦!! 個時就諗, 唔知佢哋會唔會表演過12點呢? 點知一直係咁唱, 真係好好好正, 佢哋5個真係好元氣, 而且睇得出佢哋都好開心, 所以我都睇得好開心, 嗌哂出來. 而且佢哋唱Lion heart呀!!!! 跟住又忍唔住喊咗出來, 所以2011年第一滴眼淚話咁快就比咗smap啦.
之後就到talk部份, 以為只係佢哋吹吓水就完啦, 點知, 之後仲唱, 唱完一首以為完啦, 點知又有, 唱完又以為冇, 點知又唱又跳, 所以一直係個mon前係咁嗌!! 唱完已經差唔多12點半啦!! 簡直係mini concert, 因為有MC, 又唱咗9首歌, 而且大部份歌都係no cut version!
唱完之後仲去返studio傾計, 真係大滿足!! 新嘅一年就可以睇到佢哋5個, 而且仲係陪我倒數, 2011年又係smap debut20週年, 因此對我來講2011年絕對係一個好嘅開始, 而且會係一個美好嘅一年!!!
P R
プロフィール
  • プロフィール画像
  • アイコン画像 ニックネーム:レスリー
読者になる
2011年11月
« 前の月  |  次の月 »
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30
カテゴリアーカイブ
最新コメント