敷衍 

2006年01月06日(金) 20時34分
驚驚..尋晚一瞓著就發惡夢..瞓著同嚇醒前後加埋都係十分鐘到..驚驚..個夢好真實..當時突然成個人唔陏得..想叫又叫唔到....醒咗之後好驚..send sms俾阿銘..不過send幾個先回一個..勁敷衍..唔同佢講嘢啦..之後成晚都冇乜點瞓..到朝早先瞓著..而上晝嘅堂就緊係冇返啦..

趕返學校上A/C堂..真係好耐都冇咁專心了..不過聽完之後都唔係好明..唉..放咗學..落二樓搵維他..佢話要拎風褸for星期日百萬行著..嘩弊..出事..件風褸螢光酷I..仲要得細碼..背脊仲有個大大logo寫住"明愛及成人教育中心-九龍"..頂...實俾人笑死..仲會可能見到阿銘添..

同爸爸食嘢同行咗陣..又想織頸巾添..之後搭車返屋企..好眼瞓..返到屋企見到老媽子出門..問佢去邊..佢話去街食飯..仲反問番我..乜唔係唔返屋企食?..吓..我幾時有講過呀?..算..今晚自己食自己..不過一個人好驚..再找個廚房..冇嘢食..唉..叫豬婆入嚟陪我食..又唔肯..downdown吓..阿銘打電話嚟..傾咗陣..好番d..

悶悶哋..上上網..見到"豬仔包"同"豬扒包"都大個咗啦..^^..之後網上行d人打咗成晚..想沖涼瞓覺都唔得..

經過尋晚嘅敷衍..今日諗咗好多嘢..煩惱又開始番嚟啦..

珍惜 

2006年01月05日(木) 20時32分
唉..自從上次連續發咗兩個類似嘅惡夢之後..差不多晚晚三點幾四點幾都會扎醒..尋晚仲搞到濕哂..出哂汗..晚晚都發好多夢..奇怪在實有一個有佢份的..唉..

今日涼番好多..一返到學校..好攰..瞓咗陣..之後諗住專心聽書..點知今日Ann Wong一上堂就出波功..平時都係講講吓先出..今日一開波就出招..搞到一二三四五六個死哂..Zzz..之後醒哂..專心上堂..到tax堂..更加專心..不停做數做數..

放咗學..齊齊上五樓food court lunch..食飽飽就各散了..菜細佬陪我去好景拎貨..之後就搭車返舖頭頂一陣..

八點幾收工返屋企..食飯"浪"衫洗碗睇電視沖涼上網瞓覺..

珍惜這一段日子..

似師奶??? 

2006年01月04日(水) 20時28分
差啲瞓過龍..好彩..

我今日好專心上堂..不過好眼瞓..一襯miss講完..就瞓陣先..之後食完lunch番嚟..又要open book test..測得都應該ok掛..一測完又瞓..瞓到上堂..今日上堂..唔知點解..好似食錯藥咁..勁high..心情勁好..

放學同爸爸豬,迪嘉一齊去買冷..之後就去旺中逛..逛完之後迪嘉食嘢..不停咁引誘我..我唔食呀..我要減肥肥..!!!

返到去老媽子話出去打邊爐..兩個人食到好好好飽飽呀..

小公主又就快俾阿婆激死了..同佢講電話..成舊雲咁..又同阿銘傾咗陣電話..之後去沖涼敷面膜..點知PCCW啲人上門問嘢..但當時我係帶住浴帽..冇帶眼鏡..但問題係我敷緊面膜..> <..阿銘話咪似師奶囉..似?..個個都係咁架啦..

快樂的一天 

2006年01月03日(火) 23時51分
新一年第一日返學..又懶床床..好彩都起到身返學..

尋晚成晚都冇乜瞓咁制..因為臨上床前send咗sms俾阿銘..點知冇聲氣..驚佢唔知有梼..到四點幾攰得瞓著咗一陣..

新一年我要專心上堂..上上吓終於收到阿銘短訊了..鬆一口氣..專心上堂...努力咁做correction同做tax..唔經唔覺就放學了..一齊去五樓食嘢..再同爸爸去買冷就搭車返大埔了..臨落車收到阿銘電話..佢話我"小器"..乜我真係咁小器??..

返到去過舖頭請假..點知老細要出旺角拎嘢..我要看舖..一個人悶悶..突然有個客(個感覺係衣冠禽獸果種)走入嚟..指住最高最難拎最貴果盒嘢話要睇..我即時心諗.."頂你個肺..你有冇錢買架?..要我著住條裙擒到咁高.."拎到落嚟望兩望..又話要開嚟睇..我即時話俾咗錢先有得睇..佢又肯喎..好..多謝你$1380..^^..咁就做咗千幾蚊生意..

之後同趙小姐,阿銘傾電話..趙小姐話請我哋去飲..好嘢..到時可以見到好多好耐冇見過面嘅新彊友了....同阿銘講電話..佢好似好惡咁..話我做得咁辛苦仲..不過都係為我好啫..

表姐收工返嚟幫手收舖..之後一齊去買嘢食..叫完嘢食..個老細見我打住明愛呔..就話"咦..明愛喎..送兩杯嘢俾你飲.."..哈哈..咁都有嘅..返到屋企..食飽飽..好攰..瞓覺覺了..

快樂的一天..^^

心情難以平伏 

2006年01月02日(月) 23時48分
今日偷懶冇返工..不過晨咁早..又俾老媽子嘈..之後同咗佢同埋婆婆去食嘢..然後搭車出旺角..其實今日心情不太好..唔係好想出..不過佢哋放假..是但啦..

約咗豬家姐同阿銘一點鐘..兩個都遲到..陪完佢哋去食嘢..我哋就向住旺中Neway進發..今日把聲比平日更細聲..阿銘亦比平日唱少咗..

唱完之後..行新之城..金魚街睇魚魚..大家有講有笑..阿銘仲話我好寸佢..唔同我講嘢..之後就冇講嘢..就算家姐肚痛去咗好耐廁所..其間又有個女仔傻間間咁撞咗落塊玻璃到都好..我哋都冇講嘢..果時好想喊..不過我依然係唔俾自己係佢面前喊嘅..

過咗一陣..開始冇乜嘢..行聯合..金魚街街..之後我哋去咗新彊飯堂沙嗲王食dinner..好胃痛..不過忍..入到去一坐低..見到個侍應好熟喎..係偉明..毅進成日唔見人果個..食食吓..又收到邦邦剛從台灣返嚟嘅電話... ... ...俾人"潤"咗一句..

食飽飽去咗信和行街街..之後散..家姐去搭車..阿銘去幫個fd整電腦..我自己一個慢慢咁行上新世紀搭火車..又亂諗咗好多嘢..

行返屋企途中..出事了..啲淚水又走哂出嚟..心情難以平伏..返到屋企食咗好多甜嘢同朱古力..好咗d..然後沖涼上床..send咗個sms俾阿銘就瞓覺..

元旦 

2006年01月01日(日) 23時40分
五..四..三..二..一..零六年終於到了..

尋日忍咗一日..唔忍了..

倒數完..菜細佬同家寶先出現..家寶你果然係踢拖落嚟呀..不過老公都唔請..你竟然請我細佬上去你屋企..之後我,媽媽同阿銘已經玩到癲哂..玩?我哋玩扯鞋帶囉..哈哈..之後..本來走咗嘅菜細佬同家寶走番轉頭..原來公園啲門鎖哂..佢哋走唔到..幸好我哋最終都走到..

我哋三個join埋媽媽個fd之後..就向住戲院進發..睇..我哋輸賭..唔准sleep唔准去廁所..輸咗請早餐..三個鐘多啲..坐得超超超辛苦..個位唔夠長..頂住隻腳..左挨唔係..右挨唔係..最終冇人輸..而套戲..有點失望..

差唔多五點..我哋游來游去..去咗7-11買啤酒同嘢食諗住去海傍坐..點知冇路可通..就隨便坐咗喺路邊飲了..好大風..好凍呀..我又醉了..媽媽又諗住玩嘢..問阿銘嘢..好彩俾我禁住..本來睇日出..都唔睇了..七點鐘..歸家了..等車時..好想嘔..一上車..瞓死咗..返到屋企..沖完涼跳上床..sleepsleep..之後起身趕返工..最衰阿伯返咗大陸啦..

我曾經話過..唔會再為他流一滴眼淚..可惜今早它又流出來了..亦發覺自己又深陷多咗了..唉..突然對我咁好仲等゙..你一時咁一時咁..令我好辛苦架..不過我一定唔俾自己拖過果一個日子嘅..

返工..好眼瞓..豬生豬太入咗嚟探班..之後收工..一齊過咗沙田搵妃妃食飯..之後就好攰咁返屋企了..

倒數 

2005年12月31日(土) 23時48分
返早又阿老媽子嘈醒..同佢食埋嘢之後..我就搭車出去搵kitty媽同jamie婆..佢哋喺間樓上cafe到坐..又唔可以齋坐喎..結果叫咗$35嘅朱古力飲..心諗..賺死佢..

之後我哋周圍逛..去咗kitty阿哥(即係舅父)間舖頭到睇袋..再左逛右逛..仲見到Don,Deep,Yumiko同Mandy..到咗夜晚家姐收工..我哋一齊去食新彊飯堂沙嗲王..有媽媽,家姐,舅父同表舅父..本來仲有阿銘..不過佢收工返咗屋企..話夜d先出..一路食一路笑爆嘴..侍應好笑..舅父同表舅父都好好笑..原來佢哋係傻架..食飽之後..家姐一嘢車埋嚟..整損我個嘴..之後又搞到我勁"慶"..不過我講過我今日忍..

食飽之後..我哋落咗機舖打機..打打吓..阿銘都到咗..跟住舅父同表舅父話要去銅鑼灣..家姐又因第二日要返工..所以又走埋..最後得番我,媽媽同阿銘..本來諗住喺海傍倒數..點知行行吓封咗路..所以又行番去鐘樓..左行右行..最後我哋去咗九龍公園..搵張椅坐..邊聽歌邊等夠鐘..

限期 

2005年12月30日(金) 23時45分
今日約咗寶妃,菜細佬,花花,M仔,樺樺一齊去食自助餐..一出門就唔多順利了..等咗成半個鐘先有車..搞到我遲到了..齊人了..點知果間嘢執咗..唉..結果一行六人由佐敦行..油麻地..到旺角..見到大久保..就入去食了..

食飽飽後..我哋去咗打桌球..有成十年冇玩啦..開頭幾好玩..但越玩就越悶了..結果我同家寶走咗去行街..

第一站..去咗潮特..終於下定決心買果條頸鏈..不過$210呀..> <.. 第二站..2%..又喺搵唔到想買果件衫.. 第三站..朗豪坊..左逛右逛..去到b+ab見到件褸好鍾意..五百幾蚊..嗯..問吓媽媽豬意見先..之後又2%2%..最後見到試咗..唔好睇..

菜細佬..你係咪真係冇事架?

花花對我講過"哀傷將不會帶到下個年度.."..

但我又唔捨得..因為得番一日咋..

咁我定了一個日期..係阿銘第一次有嘢想同我講果一日..不過我估你唔會記得..

懶豬仔 

2005年12月29日(木) 22時53分
今日好乖乖咁留係屋企做懶豬仔..冇去街街..

每晚差唔多鐘數都會扎醒..唔知係咪同果日個惡夢有關呢..這幾日發咗好多夢..有一半嘅夢都係發到佢呀..唉..

 

2005年12月28日(水) 22時46分
尋晚食咗啲藥..加上今日唔洗返工..所以瞓到好晏..成十二點先起..

今日全日都好乖..冇去街街..留係屋企執屋屋..而且個電話都好靜靜..

只怕一切是場夢..也怕惡夢會成真..
2006年01月
« 前の月  |  次の月 »
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31
最新コメント
ƒƒƒƒƒp[ƒN
メロメロパーク
プロフィール
  • プロフィール画像
  • アイコン画像 ニックネーム:grape721
読者になる
Yapme!一覧
読者になる